Áratug eftir að hinir mögnuðu dýralífsþættir Planet Earth voru frumsýndir er Sir David Attenborough að gera sig kláran fyrir aðra þáttaröð. Stikla úr Planet Earth 2 var frumsýnd í vikunni og er óhætt að segja að hún hafi vakið mikla athygli.

Þættirnir eru sem fyrr framleiddir af BBC og verður fyrsti þátturinn frumsýndur ytra síðar í þessum mánuði. Alls eru þættirnir sex talsins og er hver þeirra tæp klukkustund að lengd.

Planet Earth-þættirnir hlutu einróma lof gagnrýnenda á sínum tíma og eru þeir óvíða á listum yfir bestu sjónvarpsþætti sem gerðir hafa verið. Þættirnir eru dýrustu heimildarmyndaþættir sem framleiddir hafa verið, en heildarkostnaðurinn nam tuttugu milljónum punda á sínum tíma, 2,8 milljörðum króna á núverandi gengi.

Sem fyrr verður sjónum beint að einstöku dýraríki á nokkrum af afskekktustu stöðum heims. Í einum þættinum verður til að mynda fylgst með snjóhlébarða í Hemis-þjóðgarðinum á Indlandi og í öðrum þætti verður fjölskrúðugt dýralíf Madagaskar skoðað.

Hér að neðan má sjá stiklu úr Planet Earth 2. Ekki skemmir fyrir að tónlist Sigur Rósar hljómar undir.