Útvaldir fengu að sjá fyrsta þáttinn í nýrri gamanþáttaseríu
Nýir gamanþættir sem nefnast Ligeglad hefja göngu sína á RÚV annan í páskum. Í þáttunum mun leikkonan og uppistandarinn Anna Svava Knútsdóttir halda til Danmerkur þar sem hún hittir fyrir þá Helga Björnsson og Vigni Rafn Valþórsson. Meira hefur ekki verið gefið upp um þættina. Útvaldir boðsgestir fengu hins vegar að sjá fyrsta þáttinn í Hafnarhúsinu síðastliðinn föstudag og virtist hann leggjast vel í fólk sem kepptist við að lofsama Ligeglad á Twitter. Áhorfendur RÚV mega því væntanlega búast við grínveislu næstu vikur.
