Hjónin og listafólkið Tinna Gunnarsdóttir og Sigtryggur Bjarni Baldvinsson hafa sett einbýlishús sitt á Flókagötu 17 á sölu. Húsið heitir Englaborg og byggði Jón Engilberts listmálari það árið 1942 fyrir sig og fjölskyldu sína. Gunnlaugur Halldórsson arkitekt teiknaði húsið. Aðeins hafa tvær fjölskyldur búið í húsinu frá byggingu.

Húsið er 268,8 fm og skiptist í forstofu, stofu, setustofu, borðstofu og eldhús, og baðherbergi á fyrstu hæð.

Við forstofu er gengið upp á næstu hæð, fyrst tekur við rými/herbergi og síðan vinnustofa með ríflega fjögurra metra lofthæð. Vinnustofan (salurinn) gefur húsinu mikla sérstöðu enda fáheyrt að húseignir bjóði uppá aðstöðu af þessu tagi.

Á efstu hæð er herbergi með þakglugga. Á stigapalli við vinnustofuna og einnig við herbergið eru skolvaskar og á báðum hæðum möguleiki á að koma fyrir snyrtingu.

Í kjallara eru þrjú svefnherbergi, eitt þeirra hjónaherbergið er með baðherbergi, og þvottahús.

Stór og glæsilegur garður er umhverfis húsið með afar fallegum og fjölbreyttum tjágróðri. Steyptur garðveggur sem snýr að Flókagötu og Rauðarárstíg sem hannaður var af Kurt og Pí. Húsið stendur á um 650 fermetra lóð. Í garðinum eru nokkur, allt að 80 ára, hraust og falleg tré. Núverandi eigendur endurskipulögðu garðinn um aldamótin. Þá er einnig steinagarður í japönskum anda og fjölmörg blómabeð svo garðurinn er mjög fallegur frá vori til hausts.

Nánari upplýsingar um eignina má finna hér.