Hljómsveitin Coldplay hélt eftirminnilega tónleika í Boston þann 16. júlí sem munu seint líða mönnum úr minni. Ekki var það vegna tónlistarinnar heldur vegna tveggja tónleikagesta sem óraði líklega ekki fyrir því að tónleikarnir myndu draga slíkan dilk á eftir sér. Coldplay notaði svokallaða kossavél (e. kiss-cam) til að varpa upp myndum af ástföngnum tónleikagestum. Þegar myndavélin beindist að þeim Andy Byron og Kristin Cabot og krossbrá þeim. Þau höfðu verið í innilegu faðmlagi en þegar myndavélin beindist að þeim sneri Kristin sér hratt við og Andy nánast kastaði sér til hliðar. Enda voru þau bæði gift, og það ekki hvort öðru.

Andy var forstjóri tæknifyrirtækisins Astronomer, en hann hefur nú sagt af sér. Kristin starfaði hjá sama fyrirtæki sem mannauðsstjóri en fjölmiðlar greina nú frá því að hún hafi einnig sagt starfi sínu lausu. Talsmaður Astronomer staðfesti þetta í samtali við Page Six.

Myndband af áðurnefndu atviki hefur farið sem eldur í sinu um netheima og rúmlega hundrað milljónir barið það augum. Málið hefur beint athygli að bæði Astronomer sem og fyrrum forstjóranum, Byron, sem kann því áreiðanlega illa að hafa verið kastað fram í sviðsljósið með þessum hætti. Page Six hefur til dæmis greint frá því að Byron sé ekki bara konu sinni ótrúr heldur hafi hann einnig verið hörmulegur yfirmaður í sínu fyrra starfi hjá fyrirtækinu Cybereason. Hann hafi ítrekað tekið hárblásarann á starfsmenn sem voru honum ósammála og hótað þeim brottvísun. Vegna framgöngu hans hafi fjöldi starfsmanna hrökklast úr starfi.

Hvorki Byron né Cabot hafa tjáð sig opinberlega um hneykslið en talið er að hjónabönd þeirra séu nú á brauðfótum. Cabot mun hafa tekið niður giftingahring sinn og eiginkona Byron hefur fjarlægt eftirnafn hans á samfélagsmiðlum sínum.