Stórleikkonan Winona Ryder hefur upplýst um að hún hafi verið yfir sig ástfangin af goðsögninni Al Pacino á árum áður. Pacino leikstýrði Ryder í heimildarmyndinni Looking for Richard árið 1996 og urðu þau afar náin á meðan æfingum og tökum stóð. Áttu þau það sameiginlegt að elska kaffi og heimsóttu þau kaffihús um alla New York-borg um þetta leyti.
Ryder var um 25 ára gömul á þessum tíma og Pacino um þrjátíu árum eldri.
Í viðtali við Elle-tímaritið segir leikkonan að dag einn hafi hún tilkynnt Pacino að hún væri yfir sig ástfangin af honum. Honum hafi fundist það í raun krúttlegt og sagt henni að það gengi aldrei upp enda væri hún alltof ung fyrir hann.
Tíu árum síðar rákust þau á hvort annað aftur og þá kom það Ryder talsvert á óvart að kærasta Pacino var mun yngri en hún.
Þessi vonbrigði hafi þó ekki haft áhrif á vináttu þeirra og segir Ryder að þau hittist meira að segja af og til og spili póker.
Al Pacino er allt að því alræmdur fyrir sambönd sín við mun yngri konur en árið 2023 eignaðist hann barn, þá 83 ára gamall, með 31 árs gamalli kærustu sinni.
