Hjónin og atvinnudansararnir Hanna Rún Bazev Óladóttir og Nikita Bazev gerðu sér lítið fyrir og unnu í gær flokk atvinnumanna í latíndönsum í Calviá á Mallorca dance festival, sem haldið var í Calvia á Spáni um helgina.

„Tilfinningin var mjög góð,“ segir Hanna Rún í samtali  við DV um sigurinn. 

„Við vorum átta pör á þessu móti, og núna er það bara beint heim að æfa fyrir stór mót sem haldið verður í Englandi 12.apríl. Það er Super Grand Prix.“

Stutt er síðan hjónin unnu sér inn þátttökurétt á heimsleikunum sem haldnir eru á fjögurra ára fresti og aðeins 16 bestu atvinnumenn og áhugamenn WDSF komast á þá. Heimsleikarnir verða haldnir í Chengdu í Kína í ágúst.