Aaron, sem er 48 ára, er þekktastur fyrir þættina Ghost Adventures en hann gekk í hjónaband með Victoriu, sem er 32 ára, í Disneyland í Kaliforníu í ágúst 2022.
Greint var frá því á dögunum að Victoria hefði reynt að ráða leigumorðingja til að ráða hann af dögum. Var hún handtekin í síðustu viku vegna málsins og gæti hún átt þungan fangelsisdóm yfir höfði sér.
Í frétt New York Post kemur fram að hún hefði átt í samskiptum við ónefndan fanga í Flórída síðan í október á síðasta ári þar sem hún lét í ljós vilja sinn til að láta drepa Aaron svo hún gæti losnað úr hjónabandinu. Átti fanginn að finna einstakling sem var tilbúinn að taka að sér verkefnið.
„Er ég slæm manneskja? Af því að ég vil binda endi á líf hans en ekki skilja,“ er hún sögð hafa sent umræddum fanga.
Victoria er sögð hafa ætlað að borga samtals 11.515 Bandaríkjadali fyrir verkefnið, eða um eina og hálfa milljón króna, og var hún búin að leggja fram 2.500 dollara greiðslu þegar hún var handtekin.
Þá er hún sögð hafa látið fangann fá upplýsingar um hvar eiginmaðurinn væri hverju sinni sem hann átti að láta tilvonandi leigumorðingja fá.
Í frétt Post kemur fram að Aaron hafi verið staddur í Kaliforníu við tökur á Ghost Adventures þegar leigumorðinginn átti að láta til skarar skríða.
„Hann er sofandi núna á hótelherberginu. Ég þarf að vita hvað er í gangi. Var verkefnið klárað?,“ mun fanginn hafa spurt leigumorðingjann.
Ekki er vitað hvað gerðist í kjölfarið en verkefnið var að minnsta kosti ekki klárað. Segja má að tilviljun hafi ráðið því að upp komst um ráðabruggið því það gerðist þegar fangaverðir tóku eftir því að fanginn var með síma í fangaklefa sínum. Það er ólöglegt og komu samskiptin upp á yfirborðið þegar farið var yfir innihald símans.
Victoria hefur sjálf þvertekið fyrir að hafa ætlað að láta drepa Aaron og hefur sagt að aðeins hafi verið um „fantasíu“ að ræða.
