Í byrjun júní tóku íslensk lögregluyfirvöld þátt í alþjóðlegum aðgerðadögum Europol, Frontex og Interpol gegn mansali. Aðgerðirnar, undir heitinu Global Chain, náðu til 43 landa þar sem sjónum var beint að mansali með sérstaka áherslu á kynferðislega hagnýtingu (vændi), þvingaða brotastarfsemi og betl. Hér á landi var farið á þriðja tug staða/heimila og athugað með um 250 manns. 36 af þeim voru taldir hugsanlegir þolendur mansals og var öllum boðin viðeigandi aðstoð. Langflestir voru frá Rúmeníu og konur í miklum meirihluta, eða 32. Af hugsanlegum þolendum mansals seldu 34 sig í vændi, en fólkið er á aldrinum 19-54 ára. Umrædda daga voru enn fremur greind 215 flug með tilliti til hugsanlegra fórnarlamba mansals og brotamanna.
„Svo ótrúlega hörmulegt að þetta sé bara til fólk sem selur annað fólk,“ segir Þórunn Antonía í einlægum pistli á Facebook.
„Mansal hefur verið mér afar hugleikið frá því ég kynntist ungri stelpu sem kom inn í söngleik sem var settur upp í Tjarnarbíó þegar ég var 16 ára og fór þar með hlutverk. Þessi stúlka vann sem erótískur dansari á Óðal. Hún sagðist vera 18 ára en hún hefði getað verið 15-16 eins og ég.
Hún treysti mér fyrir því að hún væri ekki á Íslandi af fúsum og frjálsum vilja, „gift“ eldri manni og greinilega að vinna sem dansari og fleira gegn sínum vilja.“
Söngkonan segir að þetta hafi mótað skoðanir hennar. „Og djúpa samkennd fyrir þeim einstaklingum sem birtast í klámi og vinna við kynlífsiðnað með sinn líkama sem söluvöru,“ segir hún.
„Ég er glöð að það sé verið að taka harðar á þessum málum og ég vona að þessar manneskjur fái viðeigandi aðhlynningu og hjálp en ég efast um að það sé nokkurn tímann hægt að jafna sig eftir að hafa verið neyddur í að láta nauðga sér óteljandi sinnum.“
„Varðandi alla aumingjana sem kaupa sér aðgang að líkama kvenna ættu allir sem einn að fá á sig kæru fyrir nauðgun, frelsissviptingu og líkamsárás. Að það sé eftirspurn fyrir því að kaupa manneskjur er rótin. Ekki vera lægsta form af manneskju með að stuðla að því,“ segir hún.
