Árið 2018 sló bókin „The Salt Path“ eftir rithöfundinn Raynor Winn í gegn á Bretlandseyjum og í raun um allan heim. Bókin var sögð byggja á persónulegri reynslu Winn og eiginmanns hennar. Þau hafi misst heimili sitt eftir að hafa tekið lán og fjárfest í fyrirtæki vinar þeirra á árunum í kringum efnahagshrunið 2008. Fjárfestingin hafi mistekist hrapalega og í kjölfarið hafi lánadrottnar gengið að heimili þeirra.
Í kjölfarið hafi hjónin heimilislausu, sem voru á sextugsaldri, ákveðið að leggja af stað í langa gönguferð um suðvesturströnd Englands, sem tók upp undir ár, sem var dramatísk í meira lagi, ekki síst vegna þess að eiginmaður Winn, Moth, greindist með banvænan hrörnunarsjúkdóm, CBD .
The Salt Path sló í gegn og seldist í tveimur milljónum eintaka og var það af stórum hluta rakið til þess að um áhrifaríka sanna sögu var að ræða. Þá var myndinni gerð skil á hvíta tjaldinu í fyrra og fóru stórleikararnir Gillian Anderson og Jason Isaacs með hlutverk Winn-hjónanna. Talið er að Raynor Winn hafi hagnast um 10 milljónir punda, sem nemur 1,6 milljarði króna, af verkinu.
En nú bendir margt til þess að sagan sé ekki fyllilega sönn.
Rannsóknarblaðamaður breska miðilsins The Observer vann á dögunum grein um tilurð bókarinnar sem hefur vakið gríðarlega athygli á Bretlandseyjum. Í greininni kemur í fyrsta lagi fram að rithöfundurinn Raynor Winn heiti í raun Sally Walker og eiginmaður hennar heiti Tim.
Þau misstu sannarlega heimili sitt en hvernig það atvikaðist var með öðrum hætti en lýst var í bókinni. Sally hafði gerst sek um fjárdrátt hjá fyrrum vinnuveitanda. Hún slapp við kæru gegn því að gera skuldina upp og það gerðu hjónin með láni frá vini þeirra með veði í heimili þeirra. Þegar sá vinur lenti í alvarlegum fjárhagskröggum gengu lánadrottnar að heimili Walker-hjónanna til þess að gera upp skuldina.
Í grein The Observer kemur einnig fram að Walker-hjónin hafi einnig átt fasteign í Frakklandi, sem þau misstu ekki og voru því fjarri að vera heimilislaus.
Þá hafa læknar sett fram verulegar efasemdir um sjúkdómsgreiningu Tim – hann hafi til að mynda lifað helmingi lengur en áætlaðar lífslíkur fólks með áðurnefndan hrörnunarsjúkdóm.
Raynor Winn brást við grein The Observer með yfirlýsingu þar sem hún staðfesti að hluti ásakanna var réttur. Þar sagðist hún sjá verulega eftir fjárdrættinum sem kostaði hjónin heimili sitt en fullyrti ennfremur að heimilið í Frakklandi hefði verið í niðurníðslu og í raun verðlaust.
Þá hafi það verið mikil blessun að sjúkdómur eiginmannsins hafi reynst ódæmigerður og því hafi framþróun hans verið hægari en gengur og gerist.
Eins og áður segir hafa afhjúpanirnar vakið mikla athygli á Bretlandseyjum. Góðgerðasamtök hafa sagt skilið við samstarf með Winn og hún hefur aflýst um 17 viðburðum þar sem ráðgert var að hún myndi lesa upp úr og ræða bók sína.
