Fjöln­ir Geir Braga­son húðflúrmeistari, eða Fjölnir Tattoo, eins og allir þekktu hann best, lést 11. desember 2021, 56 ára að aldri. Fjölnir var einn vinsælasti húðflúrari landsins og talinn einn sá allra færasti í faginu. Hann var einnig vinamargur, átti ótal kunningja og líklega þekkja flestir landsmenn sem komnir eru af barnsaldri nafn hans.

Húðflúr­hátíðin Is Tatt Fest fer fram um helgina í Iðnó við Von­ar­stræti, 29. sept­em­ber til 1. októ­ber, og segja aðstandendur hátíðarinnar að aldrei hafi komið til greina að leggja hátíðina niður eftir andlát Fjölnis, en hátíðin var stofnuð af og haldin af honum alla tíð. Síðar stofnaði Fjöln­ir eig­in ráðstefnu í Fær­eyj­um, Fo Tatt Fest.

„Hátíðin er í ár hald­in í minn­ingu Fjöln­is,“ seg­ir Rún­ar Hroði Geir­munds­son, einn af skipuleggjendum. 

Á meðal viðburða á hátíðinni er keppni í mismunandi húðflúrstílum, þar á meðal ein­um nýj­um sem ber heitið „Besta Wu­tang-tattúið“. Fjöldi húðflúrlistamanna verður á staðnum og einnig er piercing í boði. 

Vinningar, vængir og tónlist

Það verður þó ekki aðeins húðflúr í boði, því mikið verður um dýrðir á hátiðinni og boðið upp á tónlist, lottó og mat. Dagpassi kostar 1.500 krónur og helgarpassinn fyrir báða daga kostar 3.500 krónur. „Allir sem borga sig inn eiga kost á að vinna veglega vinninga í lottóinu,“ segir Rúnar. 

Dregið verður lottóinu á sunnudag og á meðal vinninga eru veg­leg húðflúr kunnra lista­manna, full sleeve eft­ir Ak­sel, einn flúrdagur hjá Stan­islav Kortchevoi, gjafa­bréf hjá Scream­son, Hariu, Beardy Anz, auk fatnaðar, tíma­korta í snooker og pool, flöskuborð hjá Pablo Discobar, og fleira.

Tónlistarmenn og plötusnúðar munu taka við af húðflúrlistamönnum og halda uppi stuðinu föstudags- og laugardagskvöld.  Á föstu­dag spila Sóðaskap­ur, Boob Sweat Gang, Kristo & co., Grunge-rokk­mess­an, Há­skól­arokk­veisl­an og Krummi. Á laug­ar­dags­kvöld sjá plötusnúðarnir Sbeen­around, Thorkell­mani, Samwise og Sleazy um að halda uppi stemningunni. 

Kim Young Wings sjá um eld­húsið í Iðnó og verður hægt að fá  kjúk­linga­vængi, vefj­ur og annað nasl á hátíðinni. 

„Við stefnum á að hátíðin haldi áfram sem árlegur viðburður,“ segir Rúnar.