Matarboð geta verið svo skemmtileg. Vinir að hittast, borða góðan mat, skiptast á skemmtilegum sögum og jafnvel spila einhver spil.
Ein kona fékk þó vægt áfall þegar hún fékk reikning frá vinahjónum eftir matarboð.
Það er vissulega verðbólga víða um heim og spyr fólk sig: Var þetta of langt gengið eða er þetta framtíð matarboðanna?
Konan opnaði sig um raunir sínar á Mumsnet og útskýrði hvað hafi gerst.
Hún sagði að vinahjón hennar og eiginmanns hennar hafi boðið þeim í mat. Þau mættu með vínflösku fyrir gestgjafana, eins og þau gera alltaf þegar þau fara í slík boð.
„Þetta var góður matur en eftir matarboðið fékk hver gestur reikning og beðinn um að borga matinn sinn. Mér fannst þetta ruglað, ég myndi aldrei biðja neinn um að borga fyrir matinn sinn ef ég var sú sem bauð þeim í mat,“ sagði hún.
Hún sagði að þetta hafi verið um 3500 krónur á haus „fyrir steik og önnur hráefni.“
Viðbrögðin létu ekki á sér standa og voru margir hneykslaðir yfir hegðun gestgjafanna.
Virtust flestallir vera á sama máli um að þetta hafi verið dónaleg framkoma; ef þú ætlar að rukka gesti þá verðurðu að láta vita af því fyrirfram. Einnig benti fólk á að hún hafi komið með vín en það var ekki tekið með í reikninginn.
Netverjar hvöttu hana til að borga ekki krónu en hún viðurkenndi að hún hafi endað með að borga þeim þar sem hún þolir ekki svona óþægilegar aðstæður. Hún sagði að vinaparið væri væntanlegt í mat til þeirra eftir nokkrar vikur en hún ætli ekki að rukka þau.
