Útvarpsmaðurinn Ríkharð Óskar Guðnason, eða Rikki G eins og hann er oftast kallaður, hefur vakið athygli fyrir pælingu sem hann kom með í útvarpsþættinum Brennslunni á FM957 í gær.
Pælingin kom í kjölfar þess að Rikki las frétt eftir Kristján Kristjánsson, blaðamann DV, um að nyrsta eyja heims hafi í raun ekki verið eyja þegar allt kom til alls. Í rannsóknarleiðangri um komst í ljós að sjór var undir „eyjunni“ og að í raun væri um að ræða ísjaka sem þakinn er mold og möl á yfirborðinu.
Sjá einnig: Nyrsta eyja heims reyndist ekki vera eyja þegar allt kom til alls
„Ég er að hugsa, af því að þú veist, jörðin er ekki flöt…“ sagði Rikki eftir að hann fór yfir innihald fréttarinnar. „Hvert ertu að fara maður?“ spurði þá Egill Ploder, sem stýrir Brennslunni ásamt Rikka og Kristínu Ruth. „Má ég tala? Ég kom með „alert“ um að ég gæti „lúkkað“ fyrir að vera mjög heimskur. Þannig ég ætla bara að vera mjög hreinskilinn,“ sagði Rikki þá og kom svo með pælinguna sína.
„Ef við myndum halda áfram að sigla, bara upp eftir, myndi maður enda… suður, þú veist, sunnan megin?“
Þegar Rikki var búinn að bera upp þessa spurningu fór Egill að hlæja. „Myndi ég þá enda bara, þú veist, einhvers staðar í Ástralíu? Í staðinn fyrir að fara til baka, suðurleiðina, halda áfram norðurleiðina og þá ertu kominn suður,“ sagði Rikki svo og þá fór Egill að hlæja ennþá meira. „Já 100 prósent, þú heldur bara áfram, þú dettur ekkert af sko. Auðvitað endarðu það,“ sagði Egill og hló á meðan.
„Okei en af hverju ferðu þá ekki niður, af því að þú ert alltaf flatur þá, þú veist af því hún er ekki…“ sagði Rikki þá og Egill hló meira. „Það fyndna við þetta er að þú veist þetta ekki sjálfur,“ sagði Rikki svo og Egill sagðist víst vita að auðvitað detti maður ekki af jörðinni.
Ljóst er að þetta spjall félaganna vakti athygli hlustenda en einn slíkur birti færslu á Twitter þar sem hann sagðist þurfa að fá klippu af spjallinu. Hlustandinn segir að um „eitt fyndnasta móment íslensks útvarps“ hafi verið að ræða. „Ég þarf að fá þessa klippu.“
Eitt fyndnasta móment íslensks útvarps átti sér stað kl. 8:15 í morgun þegar Rikki G á fm957 var að velta því fyrir sér hvar maður myndi að lokum enda ef siglt yrði beint norður. Ég þarf að fá þessa klippu.
— Ingvar S. Birgisson (@ingvarsmari) September 19, 2022
Hlustandinn þurfti ekki að bíða lengi því skömmu eftir að hann óskaði eftir klippunni var hún komin í athugasemdirnar við færsluna. Hér fyrir neðan má hlusta á klippuna.
Hérna pic.twitter.com/kcwLsbX9iT
— Sigurður Ingi Ricardo (@Ziggi92) September 19, 2022
Mikil umræða varð svo til í kjölfarið sem klippan birtist. „Þessi maður þarf að eignast hnattlíkan,“ segir til dæmis einn netverji. „Þetta er svona Truman Show pæling,“ segir annar netverji. „Hahaha þetta er æðislegt, mjög einlægt og krúttlegt moment,“ segir svo enn annar.
Aðalsteinn Kjartansson, blaðamaður á Stundinni, tjáir sig einnig um málið en hann segist hafa haldið að hann væri dottinn inn í „eitthvað útvarpsleikrit“ þegar hann hlustaði á þáttinn í gærmorgun.
Sævar Helgi Bragason, vísindamiðlarinn sem oftast er kenndur við stjörnurnar, segir svo að þetta séu í alvöru ekki heimskulegar spurningar eða vangaveltur hjá Rikka. „Svörin liggja ekkert endilega í augum uppi. Hvernig veistu til dæmis að Jörðin er kúla en ekki flöt? Hvaða sönnunargögn sérðu í kringum okkur? Fólk furðar sig reglulega á lögun flugslóða á flatri kortavörpun.“
