Einar Örn Gunnarsson hefur sent frá sér skáldsöguna Ég var nóttin. Útgefandi er Ormstunga.
Ég var nóttin er Reykjavíkursaga. Eftir langa leit að leiguherbergi býðst ungum lögfræðistúdent óvænt herbergi á furðulega lágu verði í stóru einbýlishúsi í Þingholtunum. Húsið var á sínum tíma með fallegustu glæsihýsum borgarinnar en er nú í niðurníðslu. Leigusalarnir eru roskin hjón sem lifa í fortíðinni og draumórum sínum. Laganeminn er varaður við þeim en þrátt fyrir það aukast samskipti þeirra. Með tímanum fer hann að átta sig á að þau eru ekki öll þar sem þau eru séð.
Einar Örn Gunnarsson er fæddur í Reykjavík árið 1961. Hann hefur skrifað margvíslegan skáldskap, þar á meðal skáldsögurnar Næðingur, Benjamín, Draugasinfónían og Tár paradísarfuglsins. Leikrit Einars Arnar, Krákuhöllin, sem sýnt var í Nemendaleikhúsi Leiklistarháskóla Íslands, hlaut frábærar viðtökur leikhúsgesta og gagnrýnenda. Einar Örn er lögfræðingur og með meistarapróf í viðskiptastjórnun.
