Áhrifavaldurinn og vélaverkfræðingurinn Katrín Edda Þorsteinsdóttir og eiginmaður hennar Markús Wasserbaech eiga von á barni.
Katrín greindi frá þessum gleðitíðindum á Instagram í gær þar sem hún sagðist loksins geta deilt þessum fréttum með fylgjendum sínum.
Í einlægri færslunni greinir hún frá þeim erfiðu tilfinningum sem fylgja því að glíma við ófrjósemi og hvað ferlið sem því fylgdi reyndi bæði á líkama og sál hennar.
„Þið skiljið ekki hvað er búið að vera erfitt fyrir mig að halda svona risastórum hluta af lífi mínu leyndum þar sem ég er vön að koma í story og segja frá öllu, öllu, hæðum og lægðum, en hérna var ég bara ekki tilbúin að hleypa öllum inn í. partinn sem snýr að ófrjósemi. Ég get ekki lýst því í orðum hvað ég hef hlakkað til að pósta svona mynd og tala um þetta allt og hversu mikilli byrði er af mér létt.“
Katrín Edda segir að hana hafi aldrei grunað hversu mikið það tæki á að glíma við ófrjósemi.
„Að ganga í gegnum þessa glötuðu þrautabraut sem ófrjósemi er, er eitthvað sem mig hefði aldrei grunað að myndi taka svona mikið á sálina. Tilfinningin að upplifa sig gallaðan, hugsa stanslaust um hvað maður sé að gera rangt, reyna að breyta sér, fá samviskubit yfir öllu, reyna að bæta allt og fá svo tilfinninguna að alheimurinn hafi hafnað þér og þú sért ekki hæf til að verða móðir.“
Katrín segir að það að leita aðstoðar og ganga í gegnum sársaukafullar meðferðir hafi tekið á bæði líkamlega og andlega.
„Á meðan reynir þú að halda öllum boltum á lofti og tækla öll hin krefjandi verkefni lífsins eins og að vera í fullri vinnu, aukavinnu, kaupa íbúð, skrifa og gefa út bók, missa bróður þinn úr krabbameini, halda andliti á samfélagsmiðlum meðan þú sprautar þig með lyfjum á kvöldin, ferð í aðgerðir, fyllist von, missir von, fyllist von, missir von, brotnar niður.
Brotnar í mola
Brotnar í þúsund mola“
Svo hafi það loksins gerst. Hún hafi fengið jákvætt þungunarpróf og varla þorað að trúa því.
„Hvað gerist núna? Er ég ólétt? Hvað þýðir það? Hvernig er að VERA ólétt þegar líf þitt hefur snúist um að VERÐA ólétt? Og ég hélt hverja einustu sekúndu af fyrstu 12 vikunum að nú myndi þessi litli ungi yfirgefa mig. Og núna í dag á 16. viku her um bil hverja mínútu. Og ég er dauðdrepógeðslega stressuð um að hann yfirgefi mig nú þegar ég hef sagt öllum frá. En hann hefur ekki yfirgefið mig enn. Hann er enn hér.
Og ég er svo þakklát fyrir hverja sekúndu sem við fáum að vera saman. Og ég vona svo innilega að hann haldi sér enn fast í mömmu sína. Því ég þrái svo heitt að verða mamma þín.Stærsta verkefni lífsins framundan og ég gæti ekki verið tilbúnari.“
View this post on Instagram