Instagram-síðan Problematic Fame vekur athygli á muninum á raunveruleikanum og samfélagsmiðlunum og hvernig Instagram getur haft áhrif á fegurðarstaðla samfélagsins. Síðan birtir reglulega myndir sem stjörnurnar birta sjálfar á samfélagsmiðlum og ber þær saman við upprunalegu myndirnar.
Oft er mikill munur á myndum, stjörnurnar eiga það til að breyta áferðinni á húðinni sinni, minnka mittið, handleggi og svo framvegis.
Fyrir stuttu greindum við frá því að síðan kom upp um myndvinnslubreytingar Jennifer Lopez.
Í nýjustu færslunni er söngkonan Dove Cameron tekin fyrir en þetta er ekki í fyrsta skipti sem hún er til umfjöllunar á síðunni.
Problematic Fame ber saman myndir sem Dove Cameron birti á samfélagsmiðlum við upprunalegu myndirnar á Getty og er greinilegt að söngkonan hefur breytt myndunum talsvert í myndvinnsluforriti. Hún meðal annars minnkaði mittið, handleggina, hálsinn og aðra líkamshluta. Hún breytti húðáferðinni, skerpti á kjálkalínunni og breytti augnumgjörðinni, ásamt mörgu öðru. Síðan vekur einnig athygli á því að Dove breytti einnig Ashton Kutcher og Issa Rae, sem stilltu sér upp með henni fyrir eina mynd.
Í myndbandinu hér að neðan ber síðan þessar myndir saman – upprunalegu myndirnar við þær breyttu – og munurinn er sláandi.
View this post on Instagram
Problematic Fame tekur það skýrt fram að færslan sé ekki meint sem árás á Dove Cameron og hún sé glæsileg sama hvað. Heldur er verið að benda á að hversu óraunhæfir fegurðarstaðlar samfélagsins eru og að stjörnurnar sjálfar, sem gjarnan setja staðalinn, geta ekki einu sinni staðist þá.
Eins og fyrr segir hefur Dove verið áður til umfjöllunar á síðunni. Í maí 2022 opnaði Dove sig um erfiðleika við sjálfsímynd og líkamskynjunarröskun en tjáði sig ekki um að breyta myndunum sínum.
„Þessi stúlka þarf augljóslega hjálp. En á meðan ætti hún ekki að vera opinber manneskja og fyrirmynd fyrir ungar stúlkur,“ segir einn netverji.
View this post on Instagram
