Þrátt fyrir að Systur hafi ekki náð að safna mikið af stigum í lokakeppni Eurovision í gær þá stóðu þær sig samt frábærlega og var íslenska þjóðin ánægð og stolt af þeim.

Eins og allir sem fylgdust með keppninni vita þá bar Úkraína sigur úr býtum og Bretland endaði í öðru sætinu. Það kom mörgum Bretum á óvart að sjá sitt atriði ganga svona vel þar sem þeir eru margir búnir að venjast því að sjá sinn fána í síðustu sætunum. Bretland fékk til að mynda 0 stig í fyrra og hafði ekki náð að enda í efstu 10 sætunum síðan árið 2009.

Árangur Bretlands var þó ekki það eina sem kom þeim á óvart heldur var ein systirin í íslenska atriðinu sem vakti athygli þeirra. Elísabet Eyþórsdóttir, sem spilaði á bassa í íslenska atriðinu, minnti nefnilega marga Breta á prinsessuna Beatrice.

Graham Norton, sem lýsir Eurovision hjá BBC (hann er svona Gísli Marteinn-inn þeirra), hafði það sjálfur á orði í útsendingunni að Elísabet væri lík prinsessunni. „Beatrice prinsessa ákvað að vera með svona í lokin. Flott hjá henni að láta sjá sig!“ sagði Norton.

Breskir fjölmiðlar hafa síðan vakið athygli á þessum líkindum þeirra. Daily Mail birti til að mynda frétt í morgun um „konunglegu“ Eurovision-stjörnuna.