Vefsíðan og smáforritið Alfreð er líklega vinsælasti vettvangurinn fyrir fólk til að leita sér að vinnu hérlendis. Tími blaðaflettinga er löngu liðinn þegar kemur að atvinnuleit því þegar notast er við netið til að leita sér að atvinnu eru möguleikarnir mun fleiri. Hægt er til dæmis að stilla leitina sérstaklega og skoða nýjar og eldri auglýsingar á sama stað.
Einnig er hægt að nýta sér tæknina í nokkrum vöfrum til að þýða heilu atvinnuauglýsingarnar í beinni, það getur sérstaklega hentað fyrir fólk sem talar ekki íslensku. Það er þó ljóst að þessi tækni er ekki alveg fullkomin því Google Translate skilur íslenska tungu ekki alveg nógu vel.
Ansi fyndið skjáskot sem tekið var af atvinnuauglýsingu á Alfreð hefur verið að ganga manna á milli hér á landi. Ástæðan fyrir því að skjáskotið er fyndið er sú að auglýsingin er þýdd nokkuð brösulega yfir á ensku úr íslensku.
Í auglýsingunni er fyrirtækið Stoð, þjónustufyrirtæki á heilbrigðissviði, að leita að sjúkraþjálfara í stoðtækjadeildina sína. Google Translate hefur eitthvað brugðist bogalistin við þessa þýðingu því á ensku stendur að óskað sé eftir „physical trainer in the prostitution department“ eða sjúkraþjálfara í vændisdeildina.
Vonandi hafa ekki margir sjúkraþjálfarar gert þau mistök að sækja um í von um að fá að starfa í vændisdeildinni því eftir því sem DV veit er engin slík deild starfrækt hjá Stoð. Þeir sem hafa áhuga á að sækja um að starfa sem sjúkraþjálfari í stoðtækjadeildina geta hins vegar sótt um hér.
Skjáskotið sem um ræðir má sjá hér fyrir neðan: