Undanfarið hefur hjónaband NFL stjörnunnar Tom Brady og ofurfyrirsætunnar Gisele Bündchen gengið í gegnum erfitt tímabil og samkvæmt nýjustu heimildum Page Six hafa þau bæði ráðið skilnaðarlögfræðing.

Í september var greint frá því að fyrirsætan yfirgaf fjölskylduheimili þeirra í Tampa eftir heiftarlegt rifrildi og hafa þau búið í sitthvoru lagi síðan þá.

Page Six ræddi við nokkra heimildarmenn sem sögðu allir það sama: Að ástæðan fyrir öllum þessum rifrildum væri ákvörðun kappans um að hætta við að setjast í helgan stein og halda áfram að vera í eldlínunni í NFL-deildinni.

Sjá einnig: Vandræði í paradís: Farin af heimilinu eftir heiftarlegt rifrildi

„Ég hélt aldrei að þetta rifrildi myndi vera endastöð þeirra, en það lítur út fyrir það,“ segir heimildarmaður við Page Six.

„Ég held að það sé engin leið fyrir þau til baka. Þau eru bæði búin að ráða lögfræðing og eru að skoða hvernig þau munu skipta búinu, hver fær hvað og hvernig verður með fjármálin.“

Hjónin hafa verið saman síðan árið 2007 og gift síðan árið 2009. Þau eiga saman börnin Benjamin, 14 ára, og Vivian, 9 ára. Brady á soninn Jack, 15 ára, úr fyrra sambandi.