Hjónaband NFL-stjörnunnar Tom Brady og ofurfyrirsætunnar Gisele Bündchen er að ganga í gegnum erfitt tímabil samkvæmt heimildum Page Six.
Miðillinn ræddi við nokkra heimildarmenn sem sögðu allir það sama: Það eru vandræði í paradís.
Fyrirsætan hefur yfirgefið fjölskylduheimili þeirra í Tampa eftir nokkur heiftarleg rifrildi í röð. Hún er nú stödd í Costa Rica en hann í Tampa að sjá um börnin og mæta á æfingar.
Ástæðan fyrir öllum þessum rifrildum er ákvörðun kappans um að hætta við að setjast í helgan stein og halda áfram að vera í eldlínunni í NFL-deildinni.
„Tom og Gisele eru að rífast núna,“ segir heimildarmaður Page Six og bætir við að þau hafa áður gengið í gegnum svipuð tímabil en alltaf náð sáttum.
Á dögunum var greint frá því að Brady missti af ellefu æfingum í ágúst. Aðspurður um fjarveru sína sagði hann: „Þetta er persónulegt, allir eru að díla við sitt […] Ég er 45 ára, maður. Það er fullt af sjitti í gangi.“
Talsmenn Brady og Bündchen neituðu að tjá sig um málið.
Hjónin eiga saman börnin Benjamin, 14 ára, og Vivian, 9 ára. Brady á soninn Jack, 15 ára, úr fyrra sambandi.
Fyrirsætan var í viðtali við breska Vogue í maí og sagði að sambönd væru vinna. „Ég held að sambönd gerist ekki bara, þetta er ekki eitthvað ævintýri heldur tekur það vinnu að vera með einhverjum, sérstaklega ef þið eigið börn. Hans fókus er á ferilinn, minn er aðallega á börnin,“ sagði hún í maí.
Í útvarpsviðtali hjá Howard Stern árið 2020 viðurkenndi Brady að hann hefur ekki alltaf staðið sig sem faðir. „Fyrir nokkrum árum fannst Gisele ég ekki vera að sinna mínu hlutverki innan fjölskyldunnar […] og hún var ekki ánægð í hjónabandinu. Þannig ég þurfti að gera breytingar.“