Tónlistarkonan Guðrún Ýr Eyfjörð, betur þekkt sem GDRN, á von á barni. Hún tilkynnti tíðindin með skemmtilegum hætti á Instagram-síðu sinni rétt í þessu. Þar birtir tónlistarkonan sjálfu af sér sitjandi upp í rúmi í síðri peysu en hvetur svo fylgjendur sína til þess að fletta á næstu mynd. Á henni hefur hún lyft peysunni svo upp þannig að lítil óléttukúla blasir við.
Að öðru leyti greinir tónlistarkonan ekki frá því hversu langt hún er komin á leið en þetta er fyrsta barn hennar.
GDRN hefur átt mikilli velgengni að fagna í tónlistinni undanfarin ár og er sannarlega í hópi vinsælustu tónlistarmanna þjóðarinnar. Til marks um það stendur nú yfir kosning til Hlustendaverðlaunanna 2022 og þar er hún tilnefnd sem söngkona ársins og poppflytjandi ársins auk þess sem lag hennar og Jóns Jónssonar, Ef ástin er hrein, er tilnefnt sem lag ársins.
Þá hefur hún einnig gert það gott á hvíta tjaldinu undanfarið en hún var í burðarhlutverki sjónvarpsþáttaraðarinnar Kötlu úr smiðju Baltasars Kormáks sem frumsýnd var á Netflix á síðasta ári.
View this post on Instagram