Líklega er fátt vandræðalegra en að senda óvart skilaboð á rangan einstakling. Sérstaklega þegar efni skilaboðanna er viðkvæmt og persónulegt.
Maður nokkur á TikTok lendi í því að fá skilaboð sem ekki voru ætluð honum. Hins vegar varð hann ekkert sérstaklega súr með það.
Maðurinn, Kris, var á stefnumóti með konu og vörðu þau nóttinni saman. Þegar konan yfirgaf heimili hans um morguninn fékk hann skilaboð frá henni en sá strax að þau höfðu greinilega ekki verið ætluð honum.
Konan hafði ætlað að senda vinkonu skilaboð til að segja frá stefnumótinu.
„Ég er bara að ganga út frá honum núna. Ég skildi eftir brjóstahaldarann minn svo hann neyðist til þess að senda mér aftur skilaboð. Haha, ég held ég sé ástfangin?? Hvernig var kvöldið þitt?“
Kris var fljótur að svara.
„Uh kvöldið mitt var mjög gott… ég eyddi því með þér. Ég reikna með að þessi skilaboð hafi ekki átt að fara til mín?“
Því svaraði konan:
„Omg. Hunsaðu, hunsaðu, hunsaðu. Ég skammast mín rosalega.!!“
Kris sýndi síðan fylgjendum sínum brjóstahaldarann sem konan skildi eftir, og setti hann meira að segja á höfuðið.
Myndbandið hefur vakið þó nokkra athygli, þá sérstaklega þar sem ljóst var að konan hafði með vilja skilið brjóstahaldarann eftir til að tryggja að Kris hefði aftur samband.
„Þetta er eitthvað sem ég myndi gera. Ég skildi tannburstann minn einu sinni viljandi eftir,“ skrifar einn.
„Þetta virkaði samt er það ekki? Þú sendir henni skilaboð. Sniðug kona,“ skrifar annar.
„Hvað ef hún ætlaði í alvörunni að senda þetta á þig og vissi nákvæmlega hvað hún var að gera,“ spyr einn.
