Þátturinn Matur&heimili, í umsón Sjafnar Þórðar, er á dagskrá Hringbrautar í kvöld kl. 19 og aftur kl. 21.
Í þætti kvöldsins verða bolludagur og sprengidagur í forgrunni. Elenora Rós Georgsdóttir bakari og metsöluhöfundur, sem þegar hefur töfrað landsmenn upp úr skónum með útgeislun sinni og bakstri, heimsækir Sjöfn Þórðar í eldhúsið og útbýr nokkrar af sínum uppáhalds bollum fyrir áhorfendur í tilefni bolludagsins.
„Bolludagur er uppáhaldsdagur minn,“ segir Elenora en hún kallar bolludaginn þjóðhátíðardag bakara og veit fátt skemmtilegra en að baka bollur ofan í landsmenn stóru bolludagshelgina sem framundan er. Hún segist að ómögulega geta valið hvað sé sín uppáhalds bolla. „Möguleikarnir á fyllingum eru óþrjótandi og hver og einn getur valið sér þá fyllingu sem bragðlaukarnir girnast.“
Síðan liggur leið Sjafnar heim í eldhúsið til Kristínar Edwald hæstaréttarlögmanns og eldhúsdrottningarinnar með meiru en Kristínu er margt til lista lagt. Hún ætlar að fullkomna sína baunasúpu fyrir sprengidaginn og bjóða Sjöfn að njóta. Saltkjöt og baunir er rétturinn sem verður á borðum flestra landsmanna á sprengidag samkvæmt hefðinni.
„Einu sinni var baunasúpan borðuð þar til að maður var sprunginn en það er liðin tíð. Nú er að njóta og borða sig passlega saddan,“segir Kristín sem elskar að dekka borð fyrir matargesti sína. Kristínu er margt til lista lagt og fáum við smjörþefinn af því í þættinum Matur og Heimili í kvöld. Hún á það til að fara fram úr sér því hún er svo spennt fyrir dögum þar sem matur og aðra kræsingar koma við sögu.
Sem fyrr segir er þátturinn á dagskrá Hringbrautar í kvöld kl. 19 og aftur kl. 21. Brot úr þætti kvöldsins má sjá í spilaranum hér fyrir neðan:
Matur og heimili stikla 22. febrúar 2022
