Kristina Ozturk býr í borginni Batumi í Georgíu ásamt sex ára dóttur sinni, eiginmanni sínum og 20 börnum þeirra. Börnin eru á aldrinum fjögurra til fjórtán mánaða og fæddust því 20 börn þeirra á aðeins 10 mánuðum. The Sun greinir frá.
Þau fóru að þessu með hjálp staðgöngumæðra en þau borguðu hverri og einni átta þúsund evrur eða 1,2 milljónir íslenskra króna. Kostnaðurinn við að eiga 21 barn er ansi hár og eru þau alls með 16 fóstrur hjá sér í fullu starfi. Kristina segir að fjölskyldan noti 20 stóra bleyjupakka í hverri viku.
Fjölskyldan býr í þriggja hæða stórhýsi og sofa börnin tvö til þrjú saman í herbergi. Það eru því tæplega 10 barnaherbergi í húsinu. Kristina hefur ekki útilokað það að eignast fleiri börn og hefur áður sagt að hún vilji eignast 100 börn. Ekki kemur fram hvað eiginmanni hennar finnst um þá hugmynd.
