Yfirmenn eru eins misjafnir og þeir eru margir. Sumir eiga í frábæru sambandi við yfirmenn sína á meðan aðrir eru ekki svo heppnir. En við þurfum flest að vinna til að lifa og því miður getur leiðinlegur yfirmaður verið hvimleiður fylgikvilli þess.
Mörgum dreymir um að láta yfirmann sinn heyra það og lét ein kona verða að því eftir að hún sagði upp. Hún skrifaði yfirmanninum bréf.
Dóttir konunnar, sem kýs að koma fram nafnlaus, birti mynd af bréfinu á samfélagsmiðlum. Færslan hefur vakið gríðarlega athygli og fjallar Mirror um málið.
Konan vann sem þriftæknir fyrir mismunandi banka í 35 ár. Henni kom illa saman við stjórnanda hjá einu útibúi HSBC, banka í Bretlandi.
Konan var að fara á eftirlaun og ákvað að nýta síðasta daginn til að láta yfirmanninn heyra það. Hún skildi eftir bréf fyrir hann sem má sjá hér að neðan.
Hún segir að hegðun yfirmannsins hafi verið agressíf og illgjörn og hvetur hann til að vera vingjarnlegan hér eftir. „Því enginn ykkar er betri en þriftæknir,“ segir hún.
Eins og fyrr segir hefur mynd af bréfinu farið á flug um netheima. Dóttir konunnar skrifar með: „Og þess vegna elska ég mömmu mína. Hún hefur verið að þrífa banka í 35 ár og skildi eftir þetta bréf fyrir ömurlega yfirmann sinn.“
