Raunveruleikastjarnan Danielle Lloyd segir að eiginmaður hennar hafi verið „brjálaður“ þegar hún gekkst undir fegrunaraðgerð á bak við hann.
Danielle er fyrrverandi glamúrfyrirsæta og núverandi raunveruleikastjarna. Hún fór í „fox-eye“ augnaðgerð og lét einnig lyfta kjálkalínunni. Hún segist hafa heyrt um að Kardashian systurnar hafi gengist undir sömu aðgerðir og hún hafi viljað vera eins.
„Ég var orðin svo óörugg að sjá allar þessar ungu stelpur á Instagram og var byrjuð að hafa áhyggjur yfir því að eldast, ég verð 38 ára seinna á árinu og tilhugsunin um að verða fertug hræðir mig,“ segir Danielle í samtali við tímaritið Closer.
„Ég vil líta vel út og þessi aðgerð kemur í veg fyrir ummerki öldrunar. Ég hugsaði að það væri betra að koma í veg fyrir eitthvað heldur en að laga það eftir á. Ég veit að ég er með þetta á heilanum en þetta lætur mér líða betur.“
Eiginmaður Danielle, Michael, og elsti sonur hennar, Archie, sem er 11 ára, voru fyrir miklum vonbrigðum með ákvörðun hennar.
Danielle og Michael gengu í það heilaga árið 2019 og eiga saman soninn Ronnie, sem er fjögurra ára. Michael grátbað hana um að gangast ekki undir fleiri fegrunaraðgerðir.
„Michael hélt að ég væri bara að fara í einhverja snyrtimeðferð. Hann var brjálaður þegar ég kom heim, hann alveg missti það og sagði endurtekið við mig: „Þú átt eftir að fokka upp andlitinu þínu.“ Hann segir að ég sé falleg og eigi að hætta, og ég trúi honum en þetta lætur mér líða betur.“
Danielle viðurkennir að hún hafi verið mjög bólgin óg „frekar óhugnanleg“ strax eftir aðgerð.
„Archie öskraði líka á mig og spurði: „Mamma, hvað hefurðu gert við andlitið á þér?“
Danielle segist hafa útskýrt fyrir syni sínum að hún hefði gert þetta til að líða betur. Hann sýndi því skilning en var samt fyrir vonbrigðum með móður sína.