Barnaleikritið Ávaxtakarfan verður sett upp snemma á næsta ári í nýrri uppfærslu í salnum Silfurbergi í Hörpunni. Þetta kemur fram í tilkynningu frá leikhópnum.
Verkið var fyrst sett upp árið 1998 í Íslensku óperunni þar sem Andrea Gylfadóttir, Páll Óskar og Gunnar Hansson slógu í gegn. Verkið tæklar samfélagsmein eins og fordóma, einelti og mismunun á einlægum og barnvænum nótum þar sem börn og foreldrar fá að fylgjast með samfélaginu í ávaxtakörfunni þar sem íbúar þurfa að leita sátta milli ólíkra einstaklinga, enda eru sumir ber en aðrir grænmeti.
Höfundur handrits er Kikka K. M. Sigurðardóttir og leikarar Jóhanna Guðrún Jónsdóttir, Eyþór Ingi Gunnlaugsson, María Ólafsdóttir, Karl Ágúst Úlfsson, Jón Svavar, Viktoría Sigurðardóttir, Katla Njálsdóttir, Eyrún Ævarsdóttir og Jóakim Meyvant Kvaran.
„Það er langþráður draumur að leika Evu appelsínu í ávaxtakörfunni,“ segir Jóhanna Guðrún, „og ég er hrikalega spennt!“
Leikstjóri er Gói Karlsson, höfundur tónlistar og tónlistarstjóri er Þorvaldur Bjarni Þorvaldsson og aðstoðarleikstjóri er Auður Bergdís.
Leikmynda- og búningahönnuðir eru Eva Signý Berger og Alexía Rós Gylfadóttir, leikmyndasmiður er Svanhvít Thea Árnadóttir, ljósahönnuður er Freyr Vilhjálmsson, danshöfundur er Vantelle Carey, Margrét R. Jónasar stýrir leikgervinu og framleiðandi er Þorsteinn Stephensen.
Miðasala verður tilkynnt von bráðar.