Kvikmyndin Leynilöggan verður frumsýnd hér á landi á miðvikudaginn í næstu viku. Landsmenn eiga þá von á góðu miðað við þær fjölmörgu umsagnir sem hafa birst um myndina á erlendum miðlum. Umsagnirnar má taka saman með eftirfarandi hætti: grín hasar sem tekur sig ekki of alvarlega og státar af leikarateymi sem greinilega skemmti sér svo vel við tökur að það skilar sér til áhorfenda.
„Ég er viss um að það er bara tímaspursmál hvenær Hollywood nælir í leikstjórann Hannes Þór Hannesson og fær hann til að endurgera myndina. Ef það gerist þá hlýtur Jason Statham að hafa forgang í aðalhlutverkið,“ segir í einni umsögn.
Í annari umsögn segir: „Besta hasar-löggu-satíra sem hefur nokkurn tímann verið leikstýrt af markmanni sem hefur varið víti frá Messi á heimsmeistaramóti.“
Í enn annari segir að myndin: „Lætur Reykjavík líta út eins og rétta staðinn fyrir Vin Diesel“
Inn á Imdb er söguþræði myndarinnar lýst með eftirfarandi hætti: Lögreglumaður í afneitun um kynhneigð sína fellur kylliflatur fyrir nýjum samstarfsmanni á meðan þeir rannsaka röð bankarána.
Leikstjóri myndarinnar er knattspyrnumaðurinn Hannes Þór Hannesson. Hann samdi einnig söguþráð myndarinnar ásamt Auðunni Blöndal og Agli Einarssyni, sem fara einnig með aðalhlutverk myndarinnar, og skrifaði svo handritið með þeim Sverri Þór Sverrissyni og Nínu Pedersen.
Aðrir leikarar eru, svo dæmi séu tekin; Steinunn Ólína Þorsteinsdóttir, Vivian Ólafsdóttir, Sverrir Þór Sverrisson, Björn Hlynur Haraldsson, Júlíana Sara Gunnarsdóttir, Steinþór Hróar Steinþórsson, Gunnar Hansson, Jón Gnarr og Rúrik Gíslason.
Ný stikla úr myndinni var svo frumsýnd í dag en hana má sjá hér fyrir neðan.
