Fjölmargir Íslendingar eru nú á samfélagsmiðlinum Twitter en þó eru einnig fjölmargir sem eiga eftir að stofna þar aðgang. Sumir ætla eflaust aldrei að gera slíkt en aðrir mæta seinna á vagninn. Ein af þeim sem ákvað nýverið að stökkva á Twitter-vagninn er fjölmiðlakonan Ragnhildur Steinunn Jónsdóttir.
Fáir hafa ollið jafn miklum öldugangi á forritinu með komu sinni þangað og Ragnhildur Steinunn. Eftir einungis um tvo sólahringa er hún komin með rúmlega 1.100 fylgjendur á samfélagsmiðlinum og þær tvær færslur sem hún hefur birt hafa vakið gríðarlega athygli.
Í fyrstu færslunni sem hún birti gerði Ragnhildur grín að sjálfri sér fyrir að vera of sein að gera aðgang á Twitter og sagði að hún væri orðin miðaldra. Hún fékk þó fljótlega athugasemdir frá aðilum sem buðu henni að súpa úr Twitter-viskubrunni sínum.
Tíu árum of sein. Mætt. Twitter crash course 101. Hjálpi mér hvað ég er orðin miðaldra.
— Ragnhildur Steinunn (@RagnhildurStein) September 20, 2021
Fjölmiðlamaðurinn Atli Fannar Bjarkason, sem er í hópi vinsælustu Íslendinganna á Twitter, bauðst til að mynda til að ræða málin við Ragnhildi. Ljóst er að Atli hefur mikla reynslu af Twitter þar sem hann stofnaði sinn aðgang fyrir rúmum 10 árum síðan og hefur síðan þá birt rúmlega 21 þúsund færslur á samfélagsmiðlinum.
Ásta Helgadóttir, fyrrum þingmaður Pírata og frambjóðandi Samfylkingarinnar í komandi alþingiskosningum, býðst líka til að taka Ragnhildi í kennslu. „Skal alveg taka þig í twitter crash course. Lykillinn að twitter er að vera með tweetdeck og flokka umræður eftiri hashtags eða aðgöngum,“ segir Ásta en Ragnhildur skilur ekki alveg hvað hún á við og spyr hana hvar orðabókin með þessum orðum fæst.
Þá furða sig sumir á því hvað Ragnhildur fékk marga fylgjendur á skömmum tíma. Ragnhildur bendir þá á að hún hafi verið valin vinsælasta stúlkan í ungfrú Ísland árið 2003 og ljóst er að vinsældirnar lifa enn.
Ég var auðvitað valin vinsælasta stúlkan í ungfrú Ísland 2003. Basic.
— Ragnhildur Steinunn (@RagnhildurStein) September 21, 2021
Ragnhildur vísaði svo aftur í sigur sinn sem vinsælasta stúlkan í seinni færslunni sem hún birti á Twitter-síðu sinni. Í þeirri færslu þakkaði hún fyrir móttökurnar og þá 511 fylgjendur sem hún var komin með fyrsta sólarhringinn. Eins og áður kemur fram hafa fylgjendurnir þó tvöfaldast síðan þá og rúmlega þá.
Vinsælasta stúlkan þakkar góðar móttökur. 511 followers á fyrsta sólarhring. Takk fyrir blómin og bréfskeytin. pic.twitter.com/xnNfhEclqN
— Ragnhildur Steinunn (@RagnhildurStein) September 21, 2021
