Bubbi Morthens er nýjasti gestur Sölva Tryggvasonar í Podcasti Sölva. Í viðtalinu ræða Sölvi og Bubbi meðal annars um tímabilið þegar hann var algjörlega stjórnlaus í djammi og fleiri hlutum, sem endaði með því að hann var settur í fangelsi.
„6. júní 1981, þá var ég tekinn í fangelsi. Þá sá ég mann sem var að girða niður um stelpu á balli hjá Utangarðsmönnum. Hann var inni í þvögunni úti í horni og auðvitað átti ég ekki að gera það sem ég gerði. Ég gargaði á strákana: „Takiði Sóló“ og svo bara óð ég í gegnum salinn og fór í manninn og meiddi hann það verulega að ég var settur í fangelsi. Ég hringdi sjálfur í lögguna, en ég var tekinn samt, af því að hann fór beina leið upp á spítala. En hann kærði ekki, líklega af því að hann var ofbeldismaður, svona skaðræði eins og ég. Þarna fattaði ég að þessi hárfína lína sem enginn virðist sjá, er gatan sem lífið og dauðinn ganga á, þarna rann upp fyrir mér að svona vildi ég ekki vera og þarna hætti ég slagsmálum.”
Bubbi ræðir einnig um tímabilið þegar hann fékk loksins heyrnartæki eftir áratugi af skertri heyrn.
„Ég er búinn að vera heyrnaskertur frá barnæsku og ég var alltaf í afneitun. Mér fannst ekki töff að vera með heyrnartæki. En svo kynnist ég Hrafnhildi og hún vildi að ég fengi mér heyrnartæki þegar við byrjuðum að búa saman í Kjósinni. Svo þegar ég labbaði út með heyrnartækin, þá fékk ég tár í augun. Þetta var rosaleg bylting, ég greindi muninn á Maríuerluþresti og mávunum og fílnum í fjallinu og hunangsflugurnar og raddir barna minna. Þetta var stórkostleg breyting. Það minnkaði allt í einu allur hávaði á heimilinu af því að ég var alltaf með allt í botni. En heyrnarskaði minn er þannig að ég mun enda heyrnarlaus, en ferlið er hægt og ég tek því af æðruleysi. Ég er með hælinn í sverðinum að renna mjög hægt niður,“ segir Bubbi.
Þáttinn í heild má sjá hér að neðan:
https://www.youtube.com/watch?v=3pV1kmwKbag&t=721s
Þú getur einnig hlustað á þáttinn á Spotify og öllum helstu hlaðvarpsveitum.