Glamúrfyrirsætan Leia Parker er 25 ára og telur sig vera með stærstu brjóst Bretlands. Hún hefur eytt rúmlega 1,7 milljón krónum í fimm brjóstastækkanir í gegnum árin. Hún fór í fyrstu aðgerðina nítján ára gömul.

Leia er í brjóstastærðinni 32NN og gengur því ekki í hvaða búð sem er til að kaupa brjóstahaldara.

Barmurinn hefur sína kosti og galla að sögn Leiu. Helsti gallinn er sá að hún getur ekki ekið bíl.

„Ég get ekki keyrt þar sem það er of sársaukafullt fyrir handleggina mína að teygja sig í stýrið,“ segir hún í samtali við Metro. Leia fer reglulega í ræktina en getur ekki hlaupið þar sem hún fær illt í bakið.

Leia segir að barmurinn hafi opnar fyrir henni nýjar dyr sem fyrirsæta. Hún byrjaði að starfa sem glamúrfyrirsæta stuttu eftir fyrstu aðgerðina og segir að það sé nóg að gera.

Leia er stolt af því að vera með „stærstu brjóst Bretlands.“ Hún fór í fyrstu þrjár aðgerðirnar í heimalandinu en fór erlendis í seinni tvær þar sem læknar í Bretlandi neituðu að stækka þau meira af heilsufarsástæðum.

„Ég skil að ég valdi það sjálf að líta svona út, og ég græði á útliti mínu, þannig ég reyni að verða ekki sár en stundum segir fólk svo hrikalega ljóta hluti,“ segir hún og bætir við að henni finnst verra þegar kynsystur hennar gera lítið úr henni.

„Einu sinni var ég á bar og ókunnug kona kom upp að mér og sagði mér að ég væri til skammar og að ég væri ástæðan fyrir því að karlmenn ráðist á konur. Augljóslega er það ekki satt. Konur eiga að hafa frjálst val varðandi útlit sitt og klæðaburð. Ég hef líka fengið að heyra að mamma mín ætti að skammast sín fyrir mig […] Ég er ekki að særa neinn þannig ég skil ekki af hverju fólk þarf að vera svona andstyggilegt.“

Leia ætlar ekki að stækka brjóstin neitt frekar, heldur ætlar hún að minnka þau í framtíðinni.

„Ég veit að ég verð ekki fyrirsæta að eilífu. Ég held að ég muni minnka brjóstin þegar ég hætti. Ég vil eignast börn einn daginn og ég vil ekki draga að mér óþarfa athygli á leikvellinum.“