Íbúa á Smáragötu í Reykjavík varð litið yfir í garð nágranna síns á dögunum og við blasti nokkuð óvenjuleg sjón: hestar voru þar á beit og gæddu sér á grasinu, sem eins og sjá má á meðfylgjandi mynd, var orðið töluvert hátt.
Eftir nánari eftirgrennslan DV um þetta skondna atvik kom í ljós að nágranninn sem um ræðir er enginn annar en Baltasar Kormákur leikstjóri, sem býr í húsinu ásamt syni sínum Baltasar Breka Samper leikara. Feðgunum hefur væntanlega fundist tilvalið að beita hestunum á gómsætt grasið í stað þess að slá. Eins og áður hefur komið fram þá er Baltasar eldri mikill hestamaður, og keypti hestabúgarð í útjaðri Reykjavíkur nú á dögunum.
