Skemmtikrafturinn Hjálmar Örn Jóhannsson fór með konu sinni, Ljósbrá Logadóttur, í ferð til Ólafsvíkur. Leigði parið húsbíl og vakti það mikla lukku hjá börnum þeirra þrigga og eins árs.

Hjálmar hafði lengi verið spenntur fyrir að ferðast um í húsbíl og að verða svokallaður „húsbíla kall“. Aðspurður hvernig ferðalagið hefði verið sagðist Hjálmar vera hæstánægður með allt.

„Ég algjörlega elskaði þetta. Það var mikil spenna fyrir ferðina og kátína allan tímann. Það hefur heldur engin bílferð verið jafn auðveld og þessi með tvö ung börn. Við fórum á Ólafsvík, sem er algjörlega geggjaður bær. Ég hafði aldrei komið þangað áður og varð ástfangin af þessum bæ. Þar er virkilega fallegt og við fórum á frábæran veitingastað sem heitir Sker. Borðuðum góðan mat og skemmtum okkur konunglega. Ólafsvík er afskaplega snyrtilegur bær og gott að vera þar. Það er engin spurning að Ólafsvík heillaði mig upp úr skónum. Ég get alveg séð mig aftur fara í húsbíla ferðalag og þá jafnvel lengra eða erlendis. Þetta var ótrúlega þægilegur ferðamáti og í bílnum var allt til alls. Maður þarf að sjálfsögðu að venjast ákveðnum hlutum. Bíllinn tekur vind á sig og maður þarf að fara varlega. Að venjast því að leggja í stæði og bakka á 7 metra löngum bíl er líka eitthvað sem maður lærir fljótt. Ég allavega get ekki séð neina neikvæða vankanta á þessu“. Segir Hjálmar hæst ánægður með fríið.