Stefán Pálsson sagnfræðingur uppljóstrar á Facebook-síðu sinni að RÚV hafi týnt mikilvægum menningarverðmætum. „SKANDALL SKEKUR RÍKISÚTVARPIÐ!!!,“ skrifar Stefán, augljóslega glettinn. Þess má geta að Stefán óskar eftir „djúsí samsettri mynd“ og varð myndasmiður DV Fókus góðfúslega við þeirri áskorun.
Hneykslið snýst um tapaða spólu. „Eins og dyggir lesendur þessarar síðu hafa mögulega fengið á tilfinninguna, er RÚV að endursýna gamlar spurningakeppnir þessar vikurnar. Á morgun verður byrjað að sýna fyrstu keppnina af sex frá árinu 1995. Sex… en ekki sjö af þeirri ástæðu að ein spólan er týnd. Það er sú með sjálfum úrslitaleiknum. Þetta hefur reyndar verið vitað í mörg ár en verið farið með sem mannsmorð. Skiljanlega. Þetta er dálítið eins og ef Þjóðminjasafnið myndi týna Valþjófsstaðahurðinni,“ segir Stefán.
Hann grunar gamlan Versling um græsku. „Við MR-ingar göntumst að sjálfsögðu með það að tapsár Verslingur hafi látið eintakið hverfa. Líklegri skýring er þó sú að einhver starfsmaður RÚV hafi gripið spóluna (það hefur verið vinsælt að endurtaka upptöku af Unglingasveitinni Kósý – einkum eftir að Raggi Kjartans varð heimsfrægur) og skilað henni aftur á rangan stað,“ skrifar Stefán og heldur áfram:
„Ef til vill lumar einhver þarna úti á VHS-upptöku, þótt ég sé ekki bjartsýnn. Held að meira að segja óðustu GB-liðin haldi ekki upp á VHS-spólurnar. Slík spóla væri aldrei í útsendingartækum gæðum, en afrit af henni ætti þó heima í safni RÚV.“