Í nýjum pistli á News.au segir Jana frá því að hún hafi byrjað að laðast að íþróttamönnum þegar hún var unglingur. Þegar hún varð eldri byrjaði hún að vinna í fjölmiðlum og var sífellt meira í reglulegu sambandi við núverandi og fyrrverandi atvinnumenn.
„Þeir sögðu eitthvað, ég hló og áður en ég vissi vorum við komin á stefnumót,“ segir Jana og segist hafa verið í sambandi með nokkrum atvinnumönnum.
„Það sem ég hef lært af reynslunni er þetta: Atvinnumenn eru ekki fyrir mig. Ó nei. Alls ekki.“
Jana segir að vandinn liggi ekki hjá atvinnumanninum sjálfum, heldur öllu umstanginu í kringum hann. Hún nefnir fjórar ástæður fyrir því að hún ætlar aldrei aftur að vera í sambandi með atvinnumanni.
„Atvinnumanni fylgir yfirleitt stór hópur kvenna sem eru tilbúnar að gera hvað sem er til að ná athygli hans. Þessar konur eru miskunnarlausar,“ segir hún.
„Þær senda honum skilaboð, elta hann á dansgólfinu og jafnvel trufla samtal ykkar til að biðja um sjálfsmynd. Það sem ég myndi gefa fyrir sjálfstraustið þeirra.“
„Sem er svo sem í lagi ef þú ert hrifin af íþróttum, en ég er það ekki. Og svo þarftu að mæta ein í brúðkaup og afmæli vina þinna því hann ferðast svo mikið,“ segir Jana.
Bandaríska hafnaboltastjarnan Trevor Bauer sagði við Sports Illustrated í fyrra að hann hefði nokkrar reglur þegar kæmi að ástarlífinu. „Og þær voru í hreinskilni sagt brútal,“ segir Jana.
„Hann sagði: „Um leið og ég finn að þú berð tilfinningar til mín þá hætti ég að hitta þig, því ég hef ekki áhuga á því að vera í sambandi og ég get ekki verið tilfinningalega til staðar. Engar samfélagsmiðlafærslur um mig á meðan við erum saman,“ sagði hann og endaði á þessum gullmola: „Ég sef hjá öðrum. Ég ætla að halda áfram að sofa hjá öðrum. Ef þér finnst það ekki í lagi þá munum við ekki sofa saman og það er í góðu lagi. Við getum bara verið vinir.“ Úff, segir hún en bætir við að hún dáist samt að hreinskilni Trevor.
„Hversu oft hefurðu verið með gaur sem var að hugsa nákvæmlega þetta en sagði það ekki?“
„Fyrir mörgum árum var ég að hitta ruðningsstjörnu og það kom í ljós að hann var algjör kvennabósi. Hann var í æfingarferð yfir helgi og ég fékk skilaboð frá stelpu sem sagði mér að hún hafði sofið hjá honum þessa helgi. Við tók mikill grátur, reiðiköst og löng skilaboð á milli okkar. Sjálfstraustið þitt fær mesta skellinn,“ segir hún.
„Það verður alltaf einhver stelpa sem er flottari en þú, sem hristir litla sæta rassinn sinn fyrir framan manninn þinn. Þú ert stöðugt að spá hvort hann sé að halda framhjá þér, sérstaklega þegar hann fer í æfingaferð. Og íþróttin verður alltaf í forgang, alltaf.“
Jana segir að í þessum pistli sé hún að einblína á það versta við að vera í sambandi með atvinnumanni í íþróttum. „Og ég veit um nokkra yndislega íþróttamenn sem tilbiðja jörðina sem makar þeirra ganga á,“ segir hún. „En ég gæti aldrei orðið ein af ykkur.“
