Baltasar Kormákur, leikstjóri og leikari, segir að uppgangur Hildar Guðnadóttur sé einn sá allra hraðasti sem hann hefur orðið vitni að. Hildur fékk Golden Globe-verðlaunin fyrir tónlistina í kvikmyndinni Joker á dögunum og þá var hún tilnefnd til BAFTA-verðlaunanna í gær.

Baltasar telur að Hildur muni einnig hljóta Óskarsverðlaunin. Hann segir í viðtali í Morgunblaðinu í dag:

„Ég spái henni Óskarnum, ég held að hún vinni hann og hún verður flottur fulltrúi sem fyrsti Íslendingurinn til að hljóta verðlaunin,“ segir Baltasar.

Baltasar þekkir vel til Hildar en hún samdi tónlistina fyrir bæði Ófærð og Eiðinn. Baltasar segir gott að vinna með henni, hún sé sanngjörn en ákveðin og berjist fyrir sínu. Hann telur að bjartir tímar séu fram undan hjá Hildi enda erfitt að komast á toppinn. Þegar þangað er komið sé algengt að sjá sömu nöfnin í stærstu verkefnunum.

„Kvikmyndatónskáld geta verið með ansi mörg verkefni á ári, miðað við leikstjóra, kannski tvær eða þrjár myndir. Jóhann var kominn á þann stað og Hildur núna sem er með ólíkindum,“ segir hann við Morgunblaðið.