Alda Jóhanna Hafnadóttir er yngsta kona sem hefur átt barn á Íslandi í seinni tíð. Hún var aðeins tólf ára þegar hún varð ófrísk og þrettán ára þegar hún eignaðist dóttur sína, Andreu Ósk, sem er orðin sextán ára.
TikTok er einn vinsælasti samfélagsmiðillinn í dag. Miðillinn er sérstaklega vinsæll hjá ungu kynslóðinni en fólk á öllum aldri notar forritið. Hver sem er hefur tækifæri á að verða „frægur“ (e. viral) á TikTok. Þú þarft ekki að vera áhrifavaldur eða hafa marga fylgjendur, þú þarft bara gott myndband.
Alda Jóhanna sló nýlega í gegn á TikTok og hefur eitt myndbanda hennar fengið tæplega 850 þúsund áhorf.
„Ég sagði við Andreu að ef eitthvað af myndböndunum mínum eiga eftir að fara „viral“ þá er það þetta. En ég hefði aldrei getað ímyndað mér að 850 þúsund manns myndu sjá þetta og hvað þá um allan heim,“ segir Alda Jóhanna í samtali við DV.
„Þetta er mjög svo skrýtin tilfinning, næstum tvisvar sinnum allt Ísland og meira.“
Í myndbandinu kemur fram að Alda hafi orðið ólétt þegar hún var tólf ára og í dag séu þær mæðgur 29 ára og 16 ára. Horfðu á það hér að neðan.
@aldajohanna@andreaoskk she is 16 and I am 29, I gave birth at 13yr ##tictok ##foryoupage ##fyp ##foryou ##4upage♬ Hungry Hippo – Tierra Whack
Alda Jóhanna lokaði fyrir athugasemdir við myndbandið.
„Það voru fullt af fínum athugasemdum en svo voru þau mörg frekar ljót,“ segir hún og bætir við að ummælin voru hreint ekki við hæfi.
„Mikið af notendum eru börn. TikTok er einn stærsti samfélagsmiðillinn í dag og það eru rosalega mörg börn þarna inn á, allt frá sex ára aldri. Svo það er mikið af myndböndum þarna sem eru ekki við hæfi barna.“