Í nýjasta þætti af Leitin að upprunanum, sem sýndir eru á Stöð 2 var talað við Guðmund Kort, sem hefur aldrei vitað faðerni sitt.

Í þættinum sagði Guðmundur frá ofbeldi af hendi móður sinnar og stjúpföður. Einnig lýsti hann furðulegri hegðun í garð yngri bróður síns, sem virðist hafa verið í uppáhaldi.

„Þetta voru mjög erfiðir tímar hjá mér þegar ég var krakki og fram eftir öllu. Þau voru bara mjög vond við mig og ég var laminn og tuskaður til.“

Síðan segir Guðmundur frá utanlandsferð sem hann fór í með eiginkonu sinni og móður. Í ferðinni fékk Guðmundur mikilvægar upplýsingar frá móður sinni. Hún sagði að faðir hans héti Dino og væri hann amerískur af ítölsku bergi brotinn, meira fékk hann þó ekki.

Móðir Guðmundar lést nokkrum árum síðar. Í kjölfarið fannst bréf með mynd af bandarískum hermanni, sem var líklega faðirinn.

Guðmundur kom síðan DNA-sýni til gagnagrunnsins Icelandic Roots, sem sýnir tengsl Vestur Íslendinga við Íslendinga. Þá kom í ljós að Guðmundur var skyldur tveimur ítölskum Ameríkönum, búsettum í Bandaríkjunum. Þeir voru mjög skyldir, virtust eiga annaðhvort sömu ömmu eða afa.

Þá fóru hjólin að snúast. Guðmundur hafði samband við annan þeirra og í ljós kom að Dino var föðurbróðir hans.

Einnig uppgötvaðist það að Dino hafði kvænst íslenskri konu nokkrum mánuðum eftir fæðingu Guðmundar. Í því hjónabandi eignaðist hann fimm börn, en hjónin bjuggu í New York.

Dino lést þó fyrir nokkrum árum, þannig að Guðmundi tókst aldrei að hitta hann. Það sem vakti sérstaka athygli var að bæði Guðmundur og Dino störfuðu lengi sem slökkviliðsmenn.