Katrín Jakobsdóttir forsætisráðherra hefur verið á ferð og flugi síðan hún tók við embætti, enda mæðir mikið á forsætisráðherra. Blátt virðist vera hennar helsti litur á mikilvægum stundum, en sá litur táknar trygglyndi og er talinn vera sá besti til að ná sínu fram á erfiðum fundum. Þá er blár einnig talinn róandi litur.
Katrín mætti í bláu pilsi þegar hún sótti Bessastaði heim í nóvember árið 2011 og freistaði þess að fá stjórnarmyndunarumboð frá herra Guðna Th. Jóhannessyni, forseta Íslands. Það gekk svona líka vel og spurning hvort blái liturinn hafi spilað þar inn í.
Þótt tíminn væri naumur og örlögin drægju þau ekki beint saman þá náði Katrín að funda með Mike Pence, varaforseta Bandaríkjanna, þegar hann stoppaði stutt, en eftirminnilega, við, á Íslandi fyrir stuttu. Katrín klæddist klassískum og klæðilegum bláum kjól við tilefnið.
Angela Merkel, kanslari Þýskalands, sótti Ísland heim fyrir stuttu. Katrín lóðsaði hana um eins og henni einni er lagið, en þegar komið var að því að ræða málin í ráðherrabústaðnum var Katrín í fallega bláum kjól. Ræddu stjórnmálastöllurnar meðal annars um loftslagsmál, stöðu stjórnmálanna í Evrópu, þróun efnahagsmála og jafnréttismál.
Blái kjóllinn sló greinilega í gegn hjá Angelu Merkel því Katrín klæddist honum aftur í síðustu viku þegar Áslaug Arna Sigurbjörnsdóttir tók formlega við embætti dómsmálaráðherra á Bessastöðum.
Á miðvikudagskvöldið var síðan komið að stefnuræðu forsætisráðherra og viti menn – Katrín valdi aftur sama fagurbláa kjólinn og hún klæddist þegar hún hitti Angelu Merkel og þegar Áslaug Arna tók við embætti. Lukkukjóll?