Það er alltaf gaman að skoða fasteignaauglýsingar og láta sig dreyma. Við ákváðum að demba okkur í heim ódýrra einbýlishúsa sem henta laghentum einkar vel. Við kynnum: Ódýrustu einbýlishús landsins.
Verð: 6 milljónir
Stærð: 117,4 fermetrar
Hundrað ára gamalt steinhús, kjallari, hæð og ris á Eskifirði. Húsið býður upp á mikla möguleika en þarfnast aftur á móti mikils viðhalds og mælt er með því að húsið sé ástandsskoðað af fagmönnum áður en kaup ganga í gegn. Innréttingar eru alls konar og líklegast flest sem myndi fjúka með nýjum eigendum.
Verð: 7 milljónir
Stærð: 132,3 fermetrar
Þetta einbýlishús er á tveimur hæðum og búið fjórum herbergjum. Það var byggt árið 1914 og er nálægt fjörunni, sem gerir staðsetninguna afar ákjósanlega. Hins vegar þarfnast húsið mikilla endurbóta og þyrfti að eyða talsverðum fjárhæðum í að koma öllu í lag.
Verð: 7 milljónir
Stærð: 102,4 fermetrar
Það er lítið gefið upp um þessa eign, annað en að hún þarfnast lagfæringar, en um er að ræða hús sem er 78,7 fermetrar að stærð og geymslu sem er 23,9 fermetrar að stærð.
Verð: 7,5 milljónir
Stærð: 67,6 fermetrar
Hefur þig einhvern tímann dreymt um að búa í Hrísey? Eða allavega eyða part úr árinu á eyjunni? Þá er tækifærið komið. Þetta litla og snotra einbýlishús er falt fyrir nokkrar milljónir. Viðhaldi hefur verið sinnt en innréttingar eru kannski ekkert til að hrópa húrra yfir. En það er bátur til sölu hjá sama aðila ef áhugi er fyrir því. Spennandi!
Verð: 8,5 milljónir
Stærð: 95 fermetrar
Gamalt og gott steinhús sem byggt var árið 1914 og getur verið laust með litlum fyrirvara. Því fylgir þúsund fermetra eignarlóð en ljóst er að taka þarf húsið all svakalega í gegn.
Verð: 9 milljónir
Stærð: 200,8 fermetrar
Tvær hæðir, sex herbergi og litríkar innréttingar – er hægt að biðja um meira? Húsið var byggt árið 1957 og frá því er gríðarlega gott útsýni yfir sjóinn. Frábært sumarhús fyrir laghenta fjölskyldu eða vinahópa.
Verð: 9,8 milljónir
Stærð: 94,1 fermetri
Skemmtilegt einbýlishús á einni hæð, en hluti hússins er klæddur að utan með bárujárni. Hér má sjá mikla möguleika og hægt að endurskipuleggja þetta fallega hús á marga vegu.
