Kynbomban og aðgerðarsinninn Pamela Anderson er byrjuð aftur með knattspyrnukappanum Adil Rami, en aðeins sex mánuðir eru síðan þau hættu saman. Pamela er 51 árs en Adil er 33ja ára.
Samkvæmt fjölmiðlinum TMZ eru Pamela og Adil búin að vera saman í nokkrar vikur. Pamela og Adil byrjuðu fyrst saman árið 2017 og flutti Pamela til Frakklands til að búa með ástmanninum. Í viðtali við The Sun bjóst hún hins vegar ekki við því að sambandið myndi endast.
„Verum ástfangin eins lengi og við getum og ef sá dagur kemur að þú horfir á mig og hugsar: „Oj“, þá get ég farið og búið í öðru landi.“
Margar sögusagnir hafa farið á flakk um af hverju þau hættu saman fyrir hálfu ári. Ein þeirra fólst í því að Pamelu fannst samband þeirra skemma fyrir þeim tíma sem Adil ætti með börnunum sínum tveimur, tvíburunum Zayn og Madi sem eru tveggja ára. Önnur flökkusaga segir að Adil hafi djammað of mikið og banni Pamelu að tala við fjölskyldu sína og vini. Þá var því einnig haldið fram í grein í Page Six að Pamela hefði slitið sambandinu vegna þess að Adil hafi byrjað að tala um hjónaband.