Fyrirlesarinn Alda Karen Hjaltalín er meðal fjölmargra gesta á hátíðinni South by Southwest sem haldin er í Austin í Texas í Bandaríkjunum. Hátíðin er tileinkuð öllu því nýjasta í tækni, kvikmyndum og tónlist.
Alda Karen birtir mynd af sér á Instagram þar sem hún sést stilla sér upp á rauða dregli hátíðarinnar. Í færslunni merkir hún stórleikarann Seth Rogen og þakkar honum fyrir gjöf sem hún fékk á sýningu nýjustu myndar hans, Longshot.
„Seth Rogen, þetta er nýi, uppáhalds jakkinn minn núna. Takk!“ skrifar hún og hvetur fólk til að fara á Longshot þegar að almennar sýningar hefjast þann 3. maí. Jakkinn umræddi er kynningarjakki sem gestir á sérstökum forsýningum myndarinnar fá gefins og er svipaður ákveðinni tísku í myndinni.
Seth birtir einnig mynd af sér á rauða dreglinum á sínum Instagram-reikning. Reffilegur að vanda, í bláu frá toppi til táar.
Longshot var heimsfrumsýnd á South by Southwest þann 9. mars og fjallar um blaðamann sem byrjar að eyða tíma með fyrrverandi barnapíu sinni, sem er í forsetaframboði.