Tveir upprennandi listamenn, þeir Arnar Þór Kristjánsson og Brynjólfur Sveinn Ívarsson, munu gefa listunnendum færi á að eignast listaverk eftir sig í Kolaportinu næstkomandi sunnudag þar sem þeir munu sýna verk sín og miðla list sinni milliliðalaust til fagurkera.

Arnar Þór Kristjánsson er þrítugur skrípateiknari úr Reykjavík sem dundar sér við allskonar skopmyndir, portretta og myndasögur sem eru svo birtar á vefsíðunni arnarart.com og facebook-síðunni Arnar Kristjansson Art. Menntaður á teiknibraut Myndlistaskólans í Reykjavík og með BFA í teiknimyndagerð frá Savannah College of Art and Design í Georgíufylki, BNA. Hefur upp á síðkastið verið að gera skrípamyndir af áhugasömum viðskiptavinum þar sem umræddum kúnnum er brugðið í líki alls kyns furðudýra sem eiga það sameiginlegt að vera víkingar.

Brynjólfur Sveinn Ívarsson er laganemi og stjórnmálafræðingur sem býr til grafíkverk og framkallar cyanotype sem er 19. aldar framköllunaraðferð. Cyanotype-tæknin var lengi vel notuð til að fjölfjalda skjöl og byggingateikningar. Sólarljósið framkallar myndirnar á pappírinn og voru þessar myndir oft nefndar sólmyndir. Helstu viðfangsefni hans eru fiskar og stafrænar klippimyndir sem framkallaðar eru með fyrrgreindri aðferð.

Þeir munu sýna og selja verk sín í Kolaportinu á milli 11-17 næstkomandi sunnudag þann 3. febrúar.