Einar Bárðarson og Biggi lögga tjá sig báðir um neikvæða umræðu fólks á samfélagsmiðlum um þátttakendur í Eurovision. Einar er sjóaður í tónlistarbransanum og átti lag um árið sem keppti fyrir Íslands hönd í Eurovision. Einar minnir á að ekki séu allir keppendur reynslumiklir og þeir þoli misvel dómhörku netverja. Hann skrifar á Facebook-síðu sína:
Eftir að hafa skannað samfélagsmiðlana í gærkvöldi og í morgun er eitt sem er mér ofar í huga en frammistaða þátttakenda í söngvakeppninni. Það er ónærgætni þeirra sem hafa á þeim skoðanir. Það eru ekki allir flytjendur og höfundar þarna þaulvanir því að lesa um sig hluti eins og “viðbjóður” og “ógeð”. Fullorðið fólk á að geta tamið sér annað mildara orðalag. Ást og friður
Biggi lögga horfir líka á undankeppnina af áhuga en segist ekki vilja taka þátt í þeim leik á Twitter að gera lítið úr þátttakendum en það finnst honum vera þreytt íþrótt. Biggi viðurkennir samt að ekki sé frammistaða allra upp á marga fiska. Hann skrifar á Facebook:
Það var nokkuð borðleggjandi að Friðrik Ómar færi áfram í kvöld. Líka að Kristina færi áfram með fimmta lagið. Fyrir vikið verður loka keppnin bara ljómandi skemmtun þrátt fyrir allt. Undankeppnin átti vissulega sínar djúpu lægðir en ég vil samt bara ekki taka þátt í twitterska íslansmeistaramótinu í því hver er bestur í að gera lítið úr öðrum á sem hnyttnastan hátt. Finnst það orðið frekar þreytt þjóðaríþrótt. Lægðirnar og klisjurnar eru eitt af því sem gera eurovision að þeirri skemmtun sem hún er. Núna verður sennilega smá umræða um það hvort Friðrik hafi fengið lagið sitt lánað hjá Rihönu. Það hlýtur að vera óhjákvæmilegt. Síðan mun hatrið að öllum líkindum sigra og allt keyrir um koll. Það er ekki annað hægt en að elska Eurovision. Af öllu lunga.
