Nafnlaus kona, sem kölluð er Grace, steig fram í pistli á vefsíðunni babe.net í fyrra og sakaði grínistann Aziz Ansari um kynferðislegt áreiti. Í pistlinum var lýst hvernig Grace fór á stefnumót með Aziz og hve ágengur spéfuglinn hefði orðið eftir stefnumótið.
Aziz bauð Grace heim til sín eftir kvöldverð á fínum veitingastað. Þegar þangað var komið dáðist Grace að borðplötu í eldhúsi grínistans.
„Hann sagði eitthvað eins og: Af hverju hopparðu ekki upp á og sest?“ segir Grace í pistlinum og bætir við að Aziz hafi síðan kysst hana. „Á augabragði var hönd hans á brjósti mínu.“
Aziz hafi síðan afklætt Grace og svo sjálfan sig. Henni segist hafa liðið illa og að mikill hiti hafi færst í leikana á stuttum tíma, að Aziz hafi til að mynda veitt henni munnmök og rekið fingur inn í leggöng hennar, þrátt fyrir að hún hafi sagt honum að róa sig og reynt að komast í burtu frá honum, sem hann leyfði ekki.
„Ég veit að ég var líkamlega að gefa merki um að ég hefði ekki áhuga. Ég held að hann hafi ekki tekið eftir því, eða hunsað merkin ef hann tók eftir þeim.“
Aziz var að prófa nýtt grínefni í New York í vikunni og talaði mikið um þessar ásakanir í fyrsta sinn frá því að hann gaf út stutta yfirlýsingu í kjölfar færslunnar í fyrra. Samkvæmt frétt Vulture sagði Aziz við áhorfendur að hann hefði ekki talað mikið um þetta því hann vildi melta þetta og ákveða hvað hann ætti að segja.
„Það er skelfilegt að tala um þetta,“ sagði Aziz. „Á tímum var ég í miklu uppnámi. Ég var niðurlægður og ég fór hjá mér. Að lokum leið mér hræðilega yfir því að þessari manneskju liði svona,“ bætti hann við.
Grínistinn vonar að þetta atvik hafi leitt til einhvers góðs.
„Ég vona að þetta hafi verið skref fram á við. Þetta lét mig hugsa mikið og ég vona að ég hafi orðið betri manneskja fyrir vikið.“
Það er sérstaklega tekið fram að Aziz baðst ekki afsökunar á athæfi sínu fyrir framan áhorfendurnar en rifjaði upp samtal við vin sinn sem sagði að pistill konunnar hafi látið hann endurhugsa öll stefnumót sem hann hefði farið á.
„Ef þetta hefur orðið til þess að ég og hinir strákarnir hugsa um þessa hluti og látið okkur vera hugulsamari og meðvitaðri og viljugri til að leggja okkur meira fram og tryggja að hinum aðilanum líði vel, þá er það gott,“ sagði hann og þakkaði áhorfendum fyrir að mæta á uppistandið sitt þrátt fyrir allt.