Kastljós tók fyrir erfiðleika í efnahagskerfinu í þætti sínum á miðvikudagskvöld, en áður en talað var við gesti þáttarins, þær Drífu Snædal, forseta ASÍ, og Ásdísi Kristjánsdóttur, forstöðumann efnahagssviðs Samtaka atvinnulífsins, voru sýnd þónokkur brot úr kvöldfréttum RÚV þar sem fjallað var um þær mörgu fjöldauppsagnir sem hafa orðið á síðustu vikum. Athygli vakti að Bogi Ágústsson, einn ástsælasti fjölmiðlamaður landsins, flutti allar þær fréttir, alla sem eina, og því engu líkara en að óveðursský uppsagna hvíli yfir Boga. Þó ekki jafn dimmt og grátt og yfir þeim sem hafa tapað vinnu sinni í versnandi árferði.