Í dag kom út lagið Helgarfrí á Spotify með Joey Christ þar sem Jón Jónsson þenur einnig raddböndin. Höfundar lags ásamt Joey og Jóni eru Logi Pedro og Arnar Ingi auk þess sem heyra má í Elísabetu Ormslev í bakröddum.

Helgarfrí var tekið upp í 101derland hljóðverinu og er fyrsta lag Joey Christ í samstarfi við Sony.

Er þetta í fyrsta sinn sem vinirnir Joey Christ og Jón vinna saman, en Joey hefur löngum verið þekktur fyrir að efla til samstarfs við ólíka listamenn.

Joey Christ er hliðarsjálf Jóhanns Kristófers Stefánssonar en fyrsta lag hans Joey Cypher var eitt vinsælasta rapplag Íslands frá upphafi og markaði það skýrt upphaf gróskunnar sem ríkir nú í íslensku rappi. Á tveimur árum gaf Jóhann út tvær plötur undir nafni Joey Christ, hitaði upp fyrir heimsfrægu rapparana Young Thug & Migos, og leikstýrði og gaf út tónlistarmyndbönd, bæði við eigin lög sem og annarra.

Joey Christ vann til tvennra verðlauna á Íslensku Tónlistarverðlaununum fyrr á þessu ári, fyrir lag- og plötu ársins í flokki rapp og hip hop tónlistar auk þess sem lagið Joey Cyphervar valið lag ársins af Grapevine. Joey vinnur nú að nýju efni ásamt Marteini Hjartarsyni, aka BangerBoy og er þriðja breiðskífa hans væntanleg á nýju ári, en með plötunni má finna skírskotanir í íslenskan samtíma og poppmenningu.

Joey Christ er á lista hjá Les Fréres Stefson útgáfunni sem heyrir undir 101derland.