Regína Ásvaldsdóttir, bæjarstjóri Mosfellsbæjar, ætlar ekki að sækjast eftir endurráðningu í starf bæjarstjóra eftir kosningarnar í vor. Þetta kemur fram í færslu sem Regína birti á Facebook-síðu sinni nú fyrir stundu.
„Þetta er ekki léttvæg ákvörðun þar sem ég hef átt í ótrúlega góðum samskiptum við oddvitana sem og aðra kjörna fulltrúa á kjörtímabilinu, ekki síst í stórum og krefjandi málum en þar hefur bæjarstjórnin öll náð góðri samstöðu. Ég hef velt því aðeins á undan mér að gefa þessa afstöðu upp en mér finnst það hreinlegast að gera það á þessum tímapunkti þannig að framboðin viti að hverju þau ganga þegar þau stilla upp á lista og hefja undirbúning að kosningum,“ skrifar Regína.
Hún segist líta stolt yfir farin veg og þakklát fyrir að hafa fengið tækifærið að stýra bæjarfélaginu.
„Starf bæjarstjóra er ákveðinn lífsstíll. Þú ert á vaktinni 24/7 og alltaf með augun á boltanum. Ég held að flestir kollega minna viti hvað ég er að tala um. Enda eru launin fín, eins og alþjóð veit. Ég er búin að vera stjórnandi í yfir 30 ár, yfirleitt með mjög mikil mannaforráð. Það er kannski kominn tími á að prófa eitthvað nýtt,“ skrifar Regína.
