Sigurður Helgi Pálmason, þingmaður Flokks fólksins, var kosinn varaforseti Evrópuráðsþingsins í dag.

„Það er mikill heiður fyrir mig að fá að takast á við þetta verkefni. Ég geri það með auðmýkt og virðingu fyrir þessari merku stofnun.“

Í færslu sinni á Facebook segist Sigurður alltaf hafa reynt að vera hreinskilinn um störf sín sem þingmaður. Í upphafi hafi það tekið hann smá tíma að átta sig á því hvernig hann gæti nýtt starfið á alþjóðlegum vettvangi. Kerfið er flókið og hlutirnir ganga stundum hægt.

„En á þessu rúma ári hef ég komist að því að þrátt fyrir allt flækjustigið er Evrópuráðsþingið nákvæmlega staðurinn þar sem við eigum að vera. Hlutverk Evrópuráðsins er að standa vörð um grundvallarhugsjónir aðildarríkjanna um mannréttindi, lýðræði og réttarríkið og stuðla að efnahagslegum og félagslegum framförum. Öllum aðildarríkjum er skylt að virða grundvallarreglur um frelsi, mannlega reisn og velferð einstaklingsins sem kveðið er á um í mannréttindasáttmála Evrópu og öðrum samningum ráðsins.

Ísland hefur átt aðild að Evrópuráðsþinginu frá árinu 1950 og hér hafa margir merki Alþingismenn og konur starfað með þá hugsjón að við erum hluti af alþjóðasamfélaginu og að okkar rödd er afar mikilvæg.“