Miðflokkurinn í Hafnarfirði lýsir þungum áhyggjum af stöðu bæjarsjóðs Hafnarfjarðar út frá ársreikningi 2024. Þrátt fyrir fullyrðingar um „trausta fjárhagsstöðu“ blasi annað við. Flokkurinn krefst gagnsæis í úthlutun fjármuna og mun á næstu vikum senda formlega upplýsingabeiðni til bæjaryfirvalda til að freista þess að fá nánari sundurliðun á ársreikningi til að hægt sé að fá skýrari yfirsýn um nýtingu útsvarsgreiðslna Hafnfirðinga. Þetta kemur fram í Facebook-færslu flokksins.

„Þrátt fyrir fögur orð um „trausta fjárhagsstöðu“ blasir við allt önnur mynd, það er rekstur sem stendur og fellur með hámarksálögum á heimili bæjarins, og það án þess að íbúar fái að sjá hvernig þeirra útsvarsgreiðslur eru nýttar.“

Miðflokkurinn bendir á að útsvarsgreiðslur íbúa standi undir megninu af starfsemi bæjarins. Þennan skattpening þurfi að nýta af ábyrgð og þeir ættu að renna í rekstur leikskóla, samgöngur, velferðarmál, innviði og aðra grunnþjónustu. Það sé því lágmarkskrafa að bæjarbúar fái að sjá hvert þeirra peningar séu í raun og veru að fara. Það geti þeir ekki í dag.

Flokkurinn bendir á að útvarshlutfall sé nánast skúfað í botn. Það sé í dag 14,93% á meðan hámark samkvæmt lögum sé 14,97%. Þetta sé því eitt hæsta hlutfall á landinu. Miðflokkurinn segir að mikil útgjöld séu vegna hælisleitenda, félagasamtaka, valdeflingarverkefna og ráðgjafar. Þessi kostnaður sé þó vel falinn í ársreikningi.

Því kallar flokkurinn eftir meira gegnsæi.

„Gagnsæi í úthlutun fjármuna – í öllum styrkjum, framlögum og ráðgjafarkostnaði skal liggja skýrt fyrir hvernig fjármagni úr bæjarsjóði, sem byggir á útsvarsgreiðslum íbúa, er ráðstafað.

Sundurliðun á tilteknum útgjaldaliðum – sérstaklega þegar kemur að kostnaði vegna hælisleitenda, fjölmenningarverkefna og loftslagsaðgerða. Íbúar eiga rétt á að vita hversu stór hluti af þeirra útsvarsgreiðslum fer í þessi mál.

Endurskoðun á forgangsröðun fjármuna – það þarf að tryggja að hagsmunir útsvarsgreiðenda séu alltaf í forgrunni þegar ákvarðanir eru teknar um úthlutun skattfjár.

Skýr framtíðaráætlun um lækkun á álögum – þegar rekstur bæjarins hefur verið tekinn föstum tökum skal stefnt að lækkun á útsvari og fasteignasköttum. Það er ekki sjálfgefið að álögur haldist við hámark árum saman.

Á næstu vikum og mánuðum mun Miðflokkurinn í Hafnarfirði senda formlegar upplýsingabeiðnir til bæjaryfirvalda, með það að markmiði að fá fram nánari sundurliðun á ársreikningi Hafnarfjarðarbæjar fyrir árið 2024, og skýra yfirsýn yfir það hvernig útsvarsgreiðslur íbúa Hafnarfjarðar eru nýttar í hverjum útgjaldalið fyrir sig.“