Námsmatskerfið, sem verið er að innleiða, mun gerbreyta öllu utanumhaldi í skólastarfi og tryggja að allar upplýsingar um nemendur séu miðlægar og fylgi þeim jafnvel þótt þeir skipti um skóla og skólaumdæmi. Þá er sérstaklega hugað að því að hægt sé að bregðast við ef þörf er á aukaaðstoð fyrir nemendur. Það mikilvægasta er að hlusta og þá ekki síst á börnin, segir Guðmundur Ingi Kristinsson, mennta- og barnamálaráðherra, sem er gestur Ólafs Arnarsonar í hlaðvarpi Eyjunnar.

Hægt er að hlusta á brot úr þættinum hér:

Eyjan - Guðmundur Ingi - 1

Þetta er náttúrlega gríðarlega mikilvægur málaflokkur. Þetta eru menntamálin og barnamálin, þetta er fjöreggið okkar, sem þú heldur á.

„Þetta skiptir bara öllu máli. Við vitum hvernig staðan hefur verið, við vitum um þá drengi sem hafa flosnað upp úr skólakerfinu vegna þess að þeir hafa ekki getað lesið sér til skilnings. Þetta eru hlutir sem við ætlum að taka virkilega á. Við verðum að hugsa um börnin fyrst, númer eitt, tvö og þrjú. Hugsum um börnin, hlustum á börnin. Við sem erum í pólitík viljum oft bara tala og tala en við þurfum stundum líka að hlusta. Þannig getum við komið góðum hlutum áleiðis,“ segir Guðmundur Ingi.

Meðal mála sem eru í umræðunni er námsmatið. Sumir, sérstaklega í stjórnarandstöðunni, vilja endilega taka aftur upp samræmd próf. Þetta námsmat, þetta er samræmt námsmat, þetta er ferli sem fylgist með börnunum yfir skólagönguna.

„Já, þarna er verið að fylgjast með alveg frá fjórða bekk upp í 10. bekk. Það er samfella í þessu öllu. Ég var á kynningu hjá Miðstöð menntunar og skólaþjónustu um það hvernig þau ætla að halda utan um þetta mat og það verður stórkostlegt þegar þetta er komið virkilega af stað vegna þess að þá er verið að fylgjast með barninu algerlega frá byrjun og alveg upp í 10. bekk. Það sem er frábært í þessu er að ef einhvern vantar aðstoð, talmeinafræðing eða vegna t.d. lesblindu, þá er líka verið að fylgjast með því og upplýsingarnar verða allar á einum stað.“

Guðmundur Ingi segir að sífellt verði metið hvernig hlutirnir skila sér, hvort þeir virki fyrir barnið. „Ef ekki þá getum við gripið inn í og reynt að finna annað sem virkar.“ Hann segir að með þessu sé m.a. verið að reyna að taka á því vandamáli þegar börn týnist í kerfinu og fái ekki þá aðstoð sem þau þurfa. í þessu kerfi fylgi allar upplýsingar barninu, líka þegar það fer í anna skóla eða skólaumdæmi. Það sé mjög mikilvægt upp á utanumhald.

Hægt er að hlusta á hlaðvarpið í heild sinni hér: